الرئيسية
نفترض ان اسم الولد زحلقة
وهو لسة صغير اخته الكبيرة بتبقا مشغلاة مرمطون عندها ههههههه
هى : زحلقة
زحلقة : نعم
هى : عارف المحل الى جانب السوق قبل الميدان
على ايديك اليمين تحت كوافير ( اعملى شعرك وادفعى دم قلبك وبعد تلت ساعات هيرجع زى الاول )
عارف المحل ده
زحلقة : اه تقريبا
هى : طيب خد هات الحاجات الى فى الوراقه دى من عنده
وياخد يا عينى الواد ورقة محشية كتابة ولا برشام الامتحانات
زحلقة : حاضر
زحلقة يا عينى ميقدرش يقول لا
هى : يلا بسرعة متتاخرش
يروح يعنى الواد مشوار بتاع 3 -4 كيلو
يتوه شوية فى الطريق ويفضل تايه كدا شوية
لغايت اما يشوف بنت خارجة كدا حطه 4 كليو اسمنت ابيض واسمر وجبس و مونة وشغل البنا دة على وشها
و شعرها ضارب فى السماء والقصة نازلة لسابع ارض ومتعرفلوش لون اساسا ورغم كدا مبتسمة جدا للحياة
يعرف ان ده الكوفير ويلاقى المحل
زحلقة : بعد ازنك يا عمو عايز الحاجات الى فى الورقة دى
الراجل : عنيا يا حبيبى
يفضل الراجل يحط ويعبى ويعمل شنطتين ما شاء الله حجم عائلى
ياخد زحلقة الشنط ويمسك اول شنط فى ايده اليمين تلقى عصاية الاتزان بتاعته قلبت و تيجى يمين
ينقل بسرعة الشنطة الشمال تقوم العصاية ظابطة
ياخد الواد المشوار كله وهو راجع بالشنطتين واخير يوصل البيت يحط الشنط على الارض بسرعه
ويبص على صوابعه يلقى صوابعة العشرة بقا لونها ازرق
ومورمه ( طبعا ده اقل واجب )
لسه هياخد نفسه ويعقد شوية
يلقى جرس الباب بيرن
اخته : زحلقة
زحلقة : نعم
روح افتح الباب
ويبقا يعنى الواد شغال طول اليوم بتاع دلفرى( من غير مرتب طبعا )
ويفتح الباب ويطلع السبت وحقل تجارب للاكل النووى الى اخته بتعمله
(وعلى راى المغنية الشهيرة الى مش فاكر اسمها )
على ادا الحال انا
وفى بعض الاوقات يكون زحلقة عنده اخته من نفس سنه ويجيى ضيوف بالليل
ويبقا يعنى الواد قاعد فى امان الله يقوم يسمع اسمه يتخض طبعا
زحلقة ومين الى بتنادى عليه
مامته انزل هات حاجة ساعقة
زحلقة : انا مش قادر يا ماما خالى سوسو تنزل ( الى هى اخته )
مامته : ازى يعنى فى بنت تنزل باللبل
زحلقة كعادتة يقول حاضر وينزل الواد مجبور الخاطر
ويفضل زحلقة يقول امتى اكبر بقا واترحم من العبودية دى ( ال يعنى لما يكبر هيترحم )
هو ده حال كل الاولد وهما صغيرين عكس البنات طبعا الى بيبقوا عايشين ومقضينها لعب 28 ساعه فى 24 الساعة ( ازاى معرفش )
والطفل منا يبقا نفسة يلعب شوية تجيله طلبيه تعكنن عليه
عرفتوا لية احنا مظلومين
